Bang BeEs

Jumat, 10 Desember 2021

ASMA - JENENG - NAMA - ARAN

# WAWAN SABDA tahun 1961, kawiwitan nalika ketemu panjenengane ing daleme kadang Suwarsa Kartadinata jalan Bintara 68 Blok Q IV Kebayoran Baru. dina Selasa Kliwon tanggal 3 - 4 April 1961 wiwit jam 23.00 -05.05. Banjur kasambung ing desa Sejiwan Purworejo, nalika aku tunggal saomah karo panjenengane. Panjenengane lenggah ing sentong wetan, aku ing sentong kulon. Kang duwe bale pomah Ibu timur Tumirin.

8.Putro Panjenengan punika sinten? : Romo : Gumantung kang ngarani.

Putro : Punapa sami kaliyan kula, kanca kanca, kadhang-kadhang kula sarta

para Ingkang sowan?

Romo : Pada. Coba tamatna! Irungku iya mung siji, Mripatku iya mung loro,

Kupingku iya mung loro, Cangkemku iya mung siji. Apa ana kang beda miturut Pandulumu, nganti mijil pitakonan mangkono?

Dadi ragane Semono kuwi pada. Ora ana bedane karo manungsa urip liyane.Dene kang marakake beda kuwi sabdane. Sabdane SEMONO.Dudu sabdane raga (waca : dudu sabdane pak Semono). SEMONO tegese Sejatine MONO. MONO tegese ESA. Dadi tembung sabdane MONO kuwi tegese sabdane ESA. Mula ora ana manungsa liyane kang wis tahu urip lan kang urip sarta kang bakal urip, bisa ngembari. Awit kabeh ana lan kang ora ana iki kabeh kawengku lan diwengku dening MONO (duweke MONO).

Putro : Kapareng kula nyuwun priksa asma panjenengan?

Romo : Yen aran : iki manungsa urip:

Yen nama aku iki pak Semono

Yen jeneng :Semono.

Yen asma : Herucakra.

Panjenengan Ingsun :Herucakra Semono.

Bedane Asma - jeneng - Nama - Aran iki tumrap aku dadi pangerten anyar. Maune daksengguh pada (synonym). Mula kagem peling para Putro, yen pinuju lenggah sowan Romo sing ati-ati migunakake tembung. Sebab tumrap Romo, kabeh tembung kuwi ana lungguhe dewe dewe.

10.

Putro : Punapa wonten bedanipun ing antawisipun Asma, Jeneng, Nama Aran? Romo : Kabeh tembung kudu ana-anane. Kudu krasa ana. Kudu ana wujude.

Kudu nyata.

11.

Putro : Asma punika lenggahipun punapa ?

Romo : Asma kuwi tegese Asale Manunggal. Dadi Asale Gelar Ana (Sir).

*Asma saka tembung As lan Ma.*

12.

Putro : Jeneng kaliyan Nama bedanipun lenggah ing pundi ?.

Romo : Jeneng kuwi jumenenge,lungguhe dat. Nama kuwi nunggale mani. Tegese gelare wis ana. Lungguhe sipat. Dadi wadahe Sir lan Dat. Utawa Sir - Dat. Manunggal sipat.

Mungguh gamblange pangerten Asma tekan Nama kuwi mengkene : Sir Manunggal Dat, Sir--Dat, Manunggal Sipat dadi Nama. Dadi Liput Linipudan. Mula gelare pangerten njaba karan (Synoniem). Mung wae lungguhe beda. Dadi padha nanging iya ora padha.

Putro : Sir punika punapa ? Dat punika punapa ? Sipat punika punapa ?

Romo : Sir kuwi obahe utawa kuasane URIP. Dat lungguhe URIP, gemblenge tetepe. Sipat kuwi gelare URIP.

Putro : Manawi makaten Asma - jeneng - Nama lan Aran wau lampahe URIP

piyambak.

Romo : Iya. Mula langgeng. Tegese tan owah gingsir. Tegese tetep ana.

Bukti lamun lakune Urip dewe iya iku : Asma - jeneng - nama- Aran tetep langgeng

, sanajan wujud wis ora ono. Umpamane raga wis mati, jeneng isih kinocapake

Putro : Aran punika punapa ?.

Romo : Aran lungguhe wujud. Dadi Sir, Dat, sipat wis Manunggal lan Wujud.

Aran saka Aksara Ha-Ra-Na yen tinulis nganggo aksara Jawa. Lungguhe PangertenHanane rasa nunggal. Pangerten iki adedasar Uni kuwi nggawa bentuk.

Ratu Adil

KANG NYUMURUPI LAN KANG NGONANGI

6. Ana insinyur praktek bagian elektro saka Pasuruan kang pinuju Surabaya Jenenge Sumantri. Nalika iku agi nglakoni tapa brata nritis 100 dina. Bengi kuwi weruh ana kreta kencana murub mubyur melesat ing angkasa. Sing nunggangi SEMONO, nalika kuwi durung tau tepung karo jeneng Semono. Sakwise ketemu lagi bisa ngarani priyayi sing nunggang kereta kencana mau Semono. Deweke banjur nglacak, satemah bisa ketemu klawan raga SEMONO.

Garwane SEMONO kang timur, nalika kuwi lagi nglakoni ngebleng 28 dina (pasa ngebleng ora mangan ora turu). Nanging Tumirin nalika kuwi ora laku ngebleng wutuh. Isih ngrokok lan ngombe). Weruh ana cahya Sumorot lumaku saka kidul kulon mengalor wetan. Cahya mau banjur nggumolong bunder gedhene ngluwihi krambil. Nuli ambyar kaping telu.Tukang - tukang becak kang kumliwer ing sakiwa tengene dalan Perak Barat 93 Surabaya. Weruh daleme pak Semono Kobar Mangalad-alad kinira kobong sarta krungu suara Pambekere lan kridane kuda galudagan.

Gerombolan priya wadon ing sangarepe gedhung wayang wong Kapasari Surabaya, weruh cahya sumorot kinira ndaru. Malah ana kang ngira lakune Brajateluh nyebar penyakit. Para ngatapa kang lagi mesu budhi ing salengkehe gunung Raung, Wilis sarta kang lagi manekung ing papan sepi entuk wisik lamun Kang Murbeng URIP wis mijil. SEMONO kang Murba Wasesa saindenge jagad raya. Para ngatapa mau pada sowan.

Sekertaris Jenderal Theosophi Sejagad ing Australia, kang teka ing Yogyakarta tahun 1958 aweh warta, weruh kepulauan Indonesia Sumorot Mubyar jam 23.00wektu Australia, kaya sinare srengenge angslup.

GOLEK SISI MELIK

BANJUR WIWIT ANA PITAKONAN - PITAKONAN :

1. Apa iki kang diarani gelare RATU ADIL kang MIJIL saka alas ketangga miturut unine ular-ular ing buku Jangka Jayabaya?

2. Apa iki kang sinebut sebut rawuhe IMAM MAHDI miturut para umat Islam?

3. Apa iki sifat kelahiran sang MESSIAS kang dikumandangake umat Kristen bakal rawuh maneh ngarepake jagad arep kiamat?

4. Apa iki sifat sang Budha Gautama kang arsa manjanma maneh ing jagad raya Sesilih Sang Budha Maestroya?

5. Apa iki panjanmane Hyang Wisnu kang Pungkasan sinebut Kali Avatara sakwise jaman Kaliyuga, awit ngregem Darma Arsa nglebur kabeh tumindak angkara, nuli anggelar jagad anyar kang kebak karahayon sarta katentreman?

6. Apa iki timbule Gusti Amat (Gusti Sura ing Ngalaga) kang kinendangake dening Pemerintah Walanda saka Ngayogyakarta menyang Manado?

7. Apa iki timbule momongane Sabdapalon miturut babad Sabdapalon kang Ciniren lamun panjebluge gunung Merapi, lamun wis ngetokake lahar miline ngidul ngulon?

8. Apa iki timbule Samanu miturut warah Theosophi? (Samanu saka tembung MANA utawa MONO)

9. Yen ginambarake ing sastra : pating bilulung lakune janma kang padha

nggoleki sisi melik. Kabeh ular-ular mau ing tembe bakal tinemu lungguhe dewe-dewe.